.
عزيز بنحرف دكالي ولد سيدي بنور ،في الأربعينات من العمر ،أصلو من جمعة امطل ، خونا وصديقنا وحبيبنا وصديق الاسرة ،و بيناتنا عشرة كبيرة تشركنا فيها الطعام و الأخوة و جميع الحوايج الزوينة .
عزيز بعد ما كمل قرايتو في المغرب و بعدما شد الدبلوم ديالو و بعد ما جرب بزاااف ديال الخدامي في المغرب ، يسر ليه الله ومشا لكندا هادي 6 سنين ،وخدام على راسو ،كأي شاب طموح يدير مستقبل زوين و يدير اوليدات .
عزيز خدم مزيان و استاقر وارتاح وخدا الجنسية الكندية و تزوج ببنت مغربية و امورو مزيانة .
في الصيف عزيز رجع للمغرب زيارة للأهل و يشوف الوالدة ديالو و خوتو و خواتاتو و يشوفنا حتا حنايا معاهم ،و دوز وقيت زوين مع ناسو و اهلو و احبابو،في حفظ الله و رعايته.
عزيز قرر انه يمشي هو ومراتو يدوزو شي أيام في البرتغال ،لكن قدر الله ما منو هروب،نهار الاربعاء 3 شتنبر 2025راكبين في قطار سياحي صغير ،وقع فيه عطب ميكانيكي تقطعو الكابلات لي شادينو و كيخرج في الحايط ،كيموتو فيه 17 واحد.
للأسف عزيز (المغربي الوحيد في القطار )مات ومراتو كلها هرس و مكرفسة بزاف .
البرتغال دارت حداد وطني و الملك ديالنا محمد السادس كلف السفير شخصيا يتكلف بجميع الاجراءات و المصاريف باش المرحوم عزيز يرجع و يتدفن في المغرب
الله يرحمك خويا عزيز و اللهيصبر الميمة ديالك وخوتك و خواتاتك ،و الله أخويا ما سخينا بيك و ليني قدر الله ما منو هروب .
و سعداتك أفاعل الخير ،راه حتا واحد منا ما ضامن عمرو و #هانتومامعلومين Aouad Adil
