سماسرة البر والبحر حتى نسمة الشاطئ باغين يبيعوها لينا . أو قال ليك علاش السياح مادخلوش للجديدة؟؟
فاش كتخرج تتمشى من الحوزية حتى مولاي عبدالله ، كتبقى غير كتقلب على بلاصة تشوف فيها البحر بلا ما تدخل لشي مقهى ولا تخلص فشي باركينغ…
ولكن مع الأسف، البحر أصبح محجوزا ، من طرف العقار الللي طمعو حتى فالرملة، وبغاو يْسيجو حتى الموج .
هاد الناس، ما خلوا لا غابة لا شط ، كلشي خصوا يتباع ويتكرى وتتحط فيه مشاريع خاصة.
اخرها واحد “أكوا بارك” داروه فوق الشاطئ، وبالضبط فبلاصة كانت مفتوحة للناس كاملين، بمدخل الجديدة واليوم أصبحت مسدودة بسياج، أوخصك تخلص باش تدخل، باش تشوف البحر خصك تدور عليه بحال شي متهم .
فين هو القانون؟ فين الجماعة ؟
فين هي الجهة المسؤولة على حماية الشواطئ؟
واش ما بقى حتى حد يوقف هاد المهزلة ؟
علاش السيد المستثمر ما دارش المشروع حدا الفندق ديالو؟
علاش مشى حتى للبحر وسدو علينا كاملين؟
وشكون عطاه الترخيص؟
كفى على راكم عيقتوا .
السيد العامل كيدير مجهودات كبيرة جدا باش يرد الاعتبار للمدينة ويطورها، وساكنة الجديدة تشكره على ذلك . رغما عن الفراقشية.
ولكن إلى خلات الدولة لوبيات العقار يديرو ما بغاو في الشواطئ، راه ما بقاش عندنا مستقبل.
نحن لسنا ضد التنمية، بالعكس، ولكن التنمية خصها تكون في مصلحة المواطنين ،
ماشي في مصلحة جيوب المنعم عليهم بفلوس العقار الذي يتم النصب فيه على الضعفاء ليبيعوا لهم اراضيهم بثمن بخس والريع. وهذا موضوع اخر.
البحر ملك للشعب .
البحر ماشي ديال شي واحد، ديال الأطفال، ديال الشيوخ، ديال العائلات اللي كتبغي غير تشم نسمة بلا ما تخلص عليها .
اليوم باعو الشاطئ،
وغدا يبيعو حتى الهوا اللي كنشموه وخ ملوث
خاصنا نفيقوا
إلى ما وقفناش ضد هاد الجشع، غادي نصبحو غرباء في بلادنا .
الساكنة، الجمعيات، الشباب، خاصهم يتحركو، يكتبو، يتكلمو، يصورو، يفضحو، يديرو عرائض، باش توصل الرسالة: ما تبيعوش
البحر ،
الجديدة سكوب
سماسرة البر والبحر…
