طلبت قهوة…

طلبت قهوة من واحد السيد كيدور ف البحر بكوجاك وبيمو والقهوة وغيرها…جلس يصايبها وجلست حداه نهضر معاه شوية..سولتو على الخدمة واش مكفياه..قاليا هذا نشاط صيفي وكل وقت كيدير بيعة..كيدور مع الزمان كيف قال بالحرف….مزوج وعندو وليدات وكاري وعامر كريديات بسباب عملية لبنتو….من الكلام لي قال..كنفيق الصباح كنتوكل على الله أني نجيب رزقي ورزق الوليدات..عمرو خيبني…كون مزيان مع الله مباشرة غتكون مزيان مع الناس..وقال شوف سبحان الله كنت مزير ف فلوس الحولي غادي ف البحر بسلعتي حتى كنلقى بزطام فيه 56 الف و3 كارط گيشي وجوج باسبورات وشي وراق..ربعيام وكنمشي للبحر وكنديه معايا…قلت ليه بالضحك كنتي تدي الفلوس..قال والله لي فوق منا شنو غتقوليه بعت الدنيا ب 56 الف….كيكمل….حتى سمعت من صحاب الباراسولات ان شي مرا كتسول على بزطام طاح ليها..داوني ليها سولتها شنو ف البزطام قالت اللون ديالو وداك الشي لي فيه بالتفصيل…قلت ليها ها رزقك كيف هو..حلات البزطام خذات الكارط كيشي والباسبورات والوراق وسداتو وقالت ليا هاذ الفلوس حلال عليك..مابغيتش نشدهم..حلفات ناخذهم…وها ربي رزقني بفلوس الحولي وحوايج الوليدات..غير كون مزيان مع الله…
هز السلعة ديالو ومشا كيبيع وانا متبعو وكنقول واش باقي بحال هاذ الناس بيناتنا؟

Related posts

Leave a Comment