السياحة الداخلية مضيعة للوقت…

▪️الصراحة السياحة الداخلية مضيعة للوقت و الفلوس و الراحة، ماكاتدوز لا كونجي لا والو. داكشي لي كاتخسر على 10 أيام ف أكادير او تطوان او طنجة…….الخ ما كاتخسروش في مجموعة من الدول.
هنا عندنا كولشي كايقلب غير ما يسرق، باغيين يديرو لباس في شهرين ديال العطلة على ظهر المواطن. السفر في المغرب ولا بحال شي حرب مع عصابة مكونة من: السماسرية لي كايشدو ديور الكراء و يضربو الثمن اضعاف مضاعفة، صحاب الباركينغ، دوك لي كايكريو البحر و كايولي ديالهم فسميتهم وسميت طاسيلتهم ماكايخليو لك فين تجلس نتايا و عائلتك الا ما خلصتيش، صحاب الطاكسيات و الكيران الانتهازيين، المقاهي و المطاعم معفونين و اعجبوك ف السميات و فالزواق، و الثمن خيالي. فينما درتي خاصك تخلص. عاد زيد البحر كيرجعوه بحال سيتي فوت كولشي لاعب كورة و يضربو الدراري الصغار و ف عباد الله…. عاد زيد واحد النوع تاني كايجيو قدامك و كايديرو ليزار على الباراسول ديالهم ماكاتبقا نتا تشوف والو بدعوى ماكايبغوش لي يشوف ليهم عيالاتهم. خليها ف الدار لاش جايبها ولا رجع اللور و خلي عباد الله تشوف البحر. و بطبيعة الحال منساوش صحاب غفل طارت عينيك، كولشي كايقلب غير ما يسرق. ما كاتحس ب الراحة حتى كاترجع لدارك و كاتلقا راسك دوزتي الكونجي غير ف صداع الرأس مع كحل الرأس.
اسبوع في الجارة الاسبانية كايتقام ارخص من اسبوع في أكادير أو تطوان. بدون مقارنة جودة الخدمات المقدمة .
40 اورو فسبانيا تجيب ليك شقة مبرعة، أما هنا المغرب موحال تجيب ليك حتى بيت مع جيران.
البحر عندنا هو البحر عندهم ؟ ماكتعرف راسك فبحر ولا موسم ها الجمل ها العاود ها البوني ….
ها جيت سكي شادين رملة كلها 5 مشرملين مشاركين في طوموبيل لوكاسيون قاليك جايين يزهاو في البحر جايبين الشيشة الشراب و المخدرات …
باقي عندنا التخلف بزاف والفوضى وقلة الاحترام، لي جا عند الاخور تيطحنو.

Related posts

Leave a Comment