امحمد البطيوي كان هو القائد الإقليمي ديال الوقاية المدنية بالجديدة في الثمانينات ، ومن الأمور لي كيسجلها ليه التاريخ، هو المشاركة ديالو الفعالة ضمن واحد الفريق ديال العمل فيه مخرج فرنسي وعتيق بن الشيكر، لي ذاك الوقت كانت البداية ديالو في الإذاعة كيقرا النشرات، قبل ميتحول للقناة الأولى ومن بعد القناة الثانية وبرنامج مسار، وهاذ الفريق هو لي أنجز واحد البرنامج عام 1986 كان الإسم ديالو “على ضفاف الأنهار ” وهي فكرة في شبه كبير برنامج طريق الحرير
ضفاف الأنهار انطلق فيه البطيوي مع فريق من البومبية على متن زودياكات من منبع ديال نهر أم الربيع مرورا بالعديد من المناطق لي كيمر منها ، حتى المصب ديالو في أزمور.
وفي كل مرة كيوصل البرنامج لشي منطقة ، كيقوم عتيق بن الشيكر بالتعليق على العادات والتقاليد ديالها والفولكلور ديالها، وكان كيسجل استجوابات مع أساتذة حول تاريخ ديالها وأنواع الطبخ والمنتوجات وغيرها .
وأنا هاذيك الساعة كنت أستاذ ديال التاريخ والجغرافيا في ابن خلدون، استدعاني النايب ديال التعليم آنذاك المرحوم عبدالكامل لحبابي، وطلب مني الالتحاق بقصبة بولعوان باش نشارك بنبذة تاريخية عنها لوصول برنامج ضفاف الأنهار إليها.
وفي الغد فعلا وصل طاقم ضفاف الأنهار للقصبة، وكان طلب مني عتيق بن الشيكر باش نركب في الزودياك وعلى متنها نتكلم على تاريخ القصبة، لكنني رفضت لزوج ديال لحوايج، أولا مكنعرافش نعوم وثانيا كان عندي واحد الحساب مع البطيوي البومبية ، نعاودو ليكم فحال الحجاية وهو أن البطيوي ورجاله كانوا جبدو السفير ديال مريكان لي كان حفظ الله ويغرق في الواليدية، وجاهم تنويه من السفارة ديال مريكان، لكن كنت من بعد كتب عليهم مقال شوية خايب في الميثاق الوطني لما غرق واحد البوليسي كان الله يرحمو سميتو اليعقوبي، ولي قام بالدور مكان البومبية لي تأخرو وعتق نصراني ومرتو من الغرق في سيدي بوزيد، لكن خاتم بحري ابتالعو ومات مسكين ، وعلى إثر ذلك جاهم من وزارة الداخلية توبيخ، وخوكم حنت مكيعرفش يعوم، ماركبتش معاهم في زودياك ودرت الاستجواب مع عتيق عند بوابة القصبة ، كنت خايف منهم ينتاقمو مني ، مقابل ذلك ركب معاهم المصطفى الغنيمي ودار معاهم استجواب على الخصائص المناخية ديال منطقة بولعوان
وأعتقد لي خاف نجا..
الاستاذ عبد الله غيتومي
