1- ملي تاخد 200 درهم: بلا ما تبقاش دير السينما في السبيطارات،والشعارات (آش هاد البلاد، الاطباء مكاينينش، الراديوات خاسرين، الدرويش معندوش فين يداوا…..)
2- ملي تاخد 200 درهم، بلا ما تبقى تغوت قدام الناس ملي تلقى الحفاري والطريق ممصلوحاش، ملي طيح في شي حفرة في الطريق نفض حويجك من الغيس وكمل طريقك حتى الحفرة الجاية
3- ملي تبيع راسك ب200 درهم، بلا متبقى تهضر علا صحاب الجيليات و تفلسف على الناس ديال الباركينغ وعلاس وكيفاش الجماعة دوزت الصفقة. خلص وسكت، المجماعة دوزاتو في صفقة ب 200 مليون لحقاش انت بعتيه قبل منها ب200 درهم
4- ملي تشد 200درهم، بلا متبقى تبان على الناس في الطوبيس ملي كيكون معطل ولا عامر بزاف وتقول ليهم بلاد كحلة، تفكر 200 درهم ديالك وسد فمك، ولا شد طاكسي كورسة.
5- ملي ضرب 200 درهم في الجيب، بلا ما تبقى تهدر على ملاعب القرب والفضاء الاخضر ودير فيها اوروبي قدام الناس وتغوت بحال شيء مواطن راقي زعما، هاديك هيا بلاصتك.
6- ملي تبيع صوتك ب200 درهم، بلا متبقى تمشي تحضر لدورات المجلس وتبدى دير فيها متتبع وفاهم الشأن العام المحلي، سير تكمش راك تلاقا مع اللي شراوك في الحملة الانتخابية وغادين يشوفو فيك شوفة ديال الحكرة والاهانة.
7- ملي يشريك مول الشكارة ب200 درهم، بلا ما تبقا تكتب في الفايسبوك على الاوضاع و دير فيها مناضل فايسبوكي،. خلاصة: ،الاوطان تبنى بالكرامة والمواقف ليس بورقة بنكية قيمتها 200 درهم
