الديبناج و القانون…

سمحو ليا غاندرج باش يوصل الميساج واضح.

كلنا كانشوفو هاد المنظر ديال الديبناج يوميا هاز طموبيلات لي خالفو القانون ، و أي واحد وقع ليه هاد البلان كايدوز نهار كحل مشا ليه النهار و غايخلص المخالفة و الديبناج و الفوريان و يشد طاكسي يجيب لوراق من الطموبيل و يرجع للكوميسارية و يقلب على لي هز ليه الطموبيل باش إخلص.

غانكونو كلنا متافقين أنه من الواجب على لي خالف القانون يخلص المخالفة حتى لهنا أوكي متافقين لي دار الذنب يستاهل العقوبة 😉

و لكن لي ماشي معقول هو علاش هاد التعقيدات كاملة و سير و اجي و خلص هنا و خلص لهيه و دير فوطوكوبي لوراق!!!!!

أنا نقوليكوم علاش ، حيت هنا كادور فلوس كحلة يعني (سوداء)، مثلا فهاد الحالة صديق ديالي هزو ليه الطموبيل تقبل و خلص الواجبات ديالو بروح رياضية لكن فاش خلص مول الديبناج طلب منو الفاكتورة هنا بدا الإحراج 😒😒😒

و هادشي علاش قلت فلوس كحلة ( الفاكتورة = الضريبة) للأسف ماكايناش الفاكتورة كاين غير بون و إلى مابغيتيش طموبيلتك بقات تماك و ضرب راسك مع الحيط.

اليوم أنا كمواطن مغربي كانطالب بتطبيق القانون لي كايوصل حتى لهنا و يحبس…. شكون كايتستر على هاد الناس و شكون مخبي ورا هاد الناس ؟ و شكون هوما هاد الناس ؟؟؟؟

من حقي ناخد الفاكتورة على أي حاجة خلصتها و هادشي كلو باش تستافدو بلادي من أي سنتيم خرج من جيبي.

و إلا كاين الحل الآخر ماتهزش ليا طموبيلتي و صيفط ليا البروصي نخلصو ياك حنا فدولة الحق و القانون 😉😉

المهم إلى داو ليا طموبيلتي ماتنساونيش ب #كل_التضامن

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *