ركن الشعراء….دكالة الغزالة

مشاهدة
أخر تحديث : الثلاثاء 4 أبريل 2017 - 8:17 مساءً
ركن الشعراء….دكالة الغزالة

بالموازاة مع النسخة الأولى لمهرجان المسقاة المسرحي الجديدة، المخصصة للمرحوم محمد سعيد عفيفي مع تكريم الحاج عبد المجيد نجدي، ألقت اموينة الأشعاري قصيدة زجلية كإهداءلأبناء دكالة.

دكالة الغزالة

للا دكالة ديما غزالة

سمحو لي الرجالة

ولكن راها بيكم

غزالة

عقلتو على عيشة

وما دارت فشي رجالة

ايوا راها ماشي غير غزالة

راها مولاتي وللا

دكالة ديما خضرة

وفالربيع

كيضويها بلعمان

زيدو عليه الجمرة

تبان كي الكمرة

فنص الشهر

وبلعمان احمر

من البعد يبهر

بحال العكر

على خدود العزبات

دكالة مضيافة

ترحب بيك بالحبيبة الكصعة

بسبع خضاري

ولالاهم الكرعة

دكالة خدودها دلاحة

تقسمات وبان قلبها

الأحمر

عيونها عسلية

عنيبات ريوكك

عليها تقطر

ومانساوش لسانها

لحلو سكر

المسقي واقيلا بالشمندر

المغروس ليها فالصدر

كرموسها بالحلاوة

يهتر

بشفايفها غطات ليه الشوك

وخلاتو بالزين يقطر

كالو على اهلك

بوطالا

ونا شفت ليك سلالا

كلمتهم تهرس الحجر

كالو عليهم ركالا

وانا عاشرتهم

فالحزة

ما يعطيوكش

بالضهر

وكالو

طويل وعالي

زين دكالي

والعيالات كصاصها

فالريح تشالي

هما سباب هبالي

زينهم يخليك تلالي

بحال البوهالي

تطلب التسليم لسيدي ربي العالي

وكل من هو والي

وانت هايم

فبحاير الدلاح

ووسط الدوالي

وما يتفاجا حالك

حتى تشم هواها

وتشوف فيك

وتضحك ليك

يا اللي من ضحكتها

تفرقو الضحكات

ومن قدها

غاروا لقدود

دكالة الغزالة

تا كرشها

هبالة

اعطاتنا عيالات

ورجالا

فيهم عولاما

وفنانات وفنانا

فالمغرب كله

حمرو الوجه

وفالعالم ليهم كلمة

بحال الشعيبية طلال

مولات اليد الذهبية

والقلب الكبير

وفنان المسرح

محمد عفيفي

وبوشعيب الدكالي

وعبد الله العروي

وعزيزة القادري

وعبد الكبير الخطيبي

وادريس الشرايبي

وللات الملحون

سناء مرحاتي

والشاب عمروس

اللي وصل للنازا

ياسيادي وسيداتي

بلا ما نساو

الحاج عبد المجيد نجدي

وهادو اللي لمونا

وسميات كثيرة

فالوزن كبيرة

ايوا كي جاتكوم

للا دكالة

غزالة ولا ماشي غزالة

اموينة الأشعاري

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجديدة سكوب الالكترونية وهي تلزم بمضمونها كاتبها حصرياً.